2020 Nov 10
Junior MasterChef Australia, ஆஸ்திரேலியாவில் ஒரு தனியார் தொலைக்காட்சி நிறுவனம் நடாத்தும் சிறுவர்களுக்கான சமையல் போட்டி. இதில் பலதரப்பட்ட சிறுவர்கள் பங்குபெற்று வந்துள்ளமை குறிப்பிடத்தக்கது. மேலும் சிறப்பு சேர்க்கும் விதமாக இலங்கையை பூர்வீகமாக கொண்ட ஜோர்ஜியா எனும் 11 வயது சிறுமியும் பங்கு பெற்றார். இவருக்கு பொதுவாகவே சமைப்பதில் ஆர்வம் இருப்பதாகவும் மேலும் தனது தாயின் ஊக்கத்தினாலும் இந்த போட்டியில் கலந்துக் கொள்ள ஆர்வம் ஏற்பட்டதாக கூறியுள்ளார்.
இந்த போட்டியில் வெற்றிபெற்ற ஜோர்ஜியா பணப்பரிசில் 25000 டொலர்களையும் பெற்றுள்ளார். இந்த பணம் அவரின் 18 ஆவது வயதில் இவர் பயன்படுத்தக்கூடியதாக இருக்குமாம். அதற்குள் அவரது எதிர்காலத் திட்டங்களை திட்டமிட்டுவிடுவேன் எனவும் அதில் உணவகம் ஒன்றை சொந்தமாக ஆரம்பிக்க இருப்பதாகவும் கூறியுள்ளார்.
ஜோர்ஜியா, இந்த சமையல் போட்டியில் பங்குபெறும்போது தான் முதல் வாரத்தை எப்படியாவது தாண்டி விட வேண்டும் என்று தான் நினைத்தாராம். மேலும் இறுதி சுற்றில் இலங்கை பாரம்பரிய உணவுகளை சமைத்து வெற்றி மகுடத்தை தரித்துள்ளார்.
