Fox Resorts – யாழ்ப்பாணம்

யாழ்ப்பாணத்தில் உங்கள் பகல் வேளை உணவினை உண்டு மகிழ சிறந்த இடமாக Fox resort அமையும். இந்த உணவகமானது யாழ்ப்பாணத்தில் கொக்குவில் பகுதியில் காங்கேசன்துறை வீதியில் அமையப் பெற்றுள்ளது. இவர்கள் விருந்தோம்பல் பண்பில் மேன்மையானவர்களாக திகழ்ந்தனர். கொவிட்-19ற்கான சுகாதார கட்டுப்பாடுகளினை முறையாக கடைப்பிடித்தனர். சமூக இடைவேளை மற்றும் அவர்களது உணவகப் பகுதி போன்ற அனைத்துமே மிகவும் நேர்த்தியாக காட்சியளித்தது.

இங்கு விலைமதிப்பில்லா யுத்த கால எச்சங்களான சில சுவர் எழுத்துக்கள் பாதுகாக்கப்பட்டு வருகின்றன. சிறிய நீச்சல் தடாகம் மற்றும் அழகிய கண்கவர் பச்சை நிறத்தால் மூடப்பட்ட தோட்டம் மற்றும் மரத்தளபாடங்கள் என அழகிய ஓர் சூழலுடன் கூடியதாக காட்சியளித்தது. உங்கள் நண்பர்களுடன் ஒன்று கூடவும் விடுமுறை நாட்களை ரிலாக்ஸாக கழிக்கவும் சிறப்பான ஓர் இடமாக Fox resort அமையும்.

இலங்கை கறி சோறு (Traditional Sri Lankan Rice & Curry) – LKR 1200 – LKR1600

இங்கு நாங்கள் பகல் வேளை உணவுக்காக Chef – A Kitchen by Fox Resorts ல் பாரம்பரிய இலங்கை சோறு மற்றும் கறி (Traditional Sri Lankan Rice & Curry) உணவுத் தொகுதியினையும் சில ஈற்றுணவுகளையும் தெரிவு செய்தோம். இந்த உணவுத் தொகுதியில் சிவப்பரிசி சோறு பருப்பு கறி, வெண்டிக்காய் கறி, பீட்றூட் கத்தரிக்காய் கறி, வாழைக்காய் பொறியல் மற்றும் அப்பளம் என்ற பிரதான மெனுவுடன் சில அசைவ கறிகளும் பரிமாறப்பட்டன. இதே மெனு மஞ்சள் சோறுடனும் பரிமாறப்படுகிறது. 

இறால் கறி – LKR 880

பொதுவாக இலங்கையர்களான நமக்கும் இறாலிற்கும் தனி ஒரு பந்தம் உண்டு. இறால் வடை, இறால் பொறியல், இறா ல் சொதி, இறால் கறி என இறால் சேர்க்கப்பட்டு சமைக்கப்படும் உணவுகள் நமக்கு பிடித்த உணவில் முதன்மை இடத்தை தானாக பெற்று விடுகிறது. நாங்கள் எத்தனையோ இடங்களில் இறால் கறியினை சுவைத்துள்ளோம் ஆனாலும் இங்குள்ள இறால் கறி ஒரு தனிச்சுவை.

மீன் கறி – LKR 600

இதைப் பற்றி விளக்க வார்த்தைகளே இல்லை. எங்கள் குழுவினர் முந்திக் கொண்டு பங்கிட்டு சாப்பிட்ட கறி இது தான். இதில் மீனின் தசைப்பகுதியில் மசாலா நன்றாக இறங்கி ஊறிப் போயிருந்தது. அதனால் இதன் சுவை உச்சத்தை தொட்டது.

ராசவள்ளி கிழங்கு – LKR 550

இது எங்கள் ஒவ்வொருவரது மனதினை மட்டுமல்லாது கண்களையும் கவர்ந்திழுத்த ஈற்றுணவு.

வாய்ப்பண் – LKR 60 (per piece)

இது நிஜமாகவே எங்களுக்கு யாழ்ப்பாண மண்ணின் மணத்தினை உணரச் செய்த ஓர் உணவு. இதற்கு தொட்டு உண்பதற்கு சீனிப்பாகு இருந்திருந்தால் மேலும் சிறப்பானதாக இருந்திருக்குமென தோன்றியது.

சவ்வரிசி பாயாசம் – LKR 400

வெயிலில் அலைந்து திரிந்து வரும் நமக்கு நம் தாய்மார் செய்து தரும் பகல் உணவிற்கான ஈற்றுணவுகளில் இதுவும் ஒன்று. உண்மையில் அம்மா வீட்டில் செய்யும் சுவையும் அதே அன்புடனும் பரிமாறப்பட்டது.

லட்டு – LKR 75 (per piece)

சிறுவர் முதல் பெரியவர் வரை விரும்பி உண்ணும் சிற்றுண்டி தான் லட்டு. ஒவ்வொரு லட்டு பிரியர்களும் இங்குள்ள லட்டினை சுவைக்க வேண்டும். இங்கு பரிமாறப்பட்ட லட்டில் இனிப்பும் மென்மையும் சிறப்பானதாக இருந்தது. இப்போதும் அதன் சுவை மனம் விட்டு பிரியாதுள்ளது.

Fox resort உணவகமானது கூகுளில் 4.6 star rate பெற்றுள்ளது. Booking.com மூலம் இவர்களது விடுதி பற்றிய மேலதிக தகவல்களை அறியலாம்.