வருடத்தில் இருமுறை முஸ்லிம்கள் பெருநாள் கொண்டாடுகிறார்கள். அவை, நோன்பு பெருநாள் மற்றும் ஹஜ் பெருநாள் ஆகும். முஸ்லிம்களின் ஹிஜ்ரி நாட்காட்டியின் இறுதி மாதமான துல்ஹஜ் மாதத்தின் பத்தாம் நாள் கொண்டாடப்படுவதே ஹஜ் பெருநாள் ஆகும்.

பல ஆண்டுகளாக குழந்தை பாக்கியம் அற்ற இப்ராஹீம் நபிக்கு இஸ்மாயில் (நபி) மகனாகப் கிடைக்கப் பெற்றார். அப்படி அருளாக கிடைக்கப்பெற்ற இஸ்மாஈல் நபியை அல்லாஹ்வின் கட்டளைக்கு ஏற்ப, இப்ராஹீம் நபி அறுத்துப் பலியிட  முனைந்து, இறைவன் மீது தாம் கொண்டிருந்த இறை நம்பிக்கையை உலகுக்கு பறைசாற்றினார். இது 5000 ஆண்டுகளுக்கு முன் நிகழ்ந்த சம்பவமாகும். இச்சம்பவத்தை நினைவு கூறும் முகமாக, உலக முஸ்லிம்கள் அனைவரும் தத்தம் வசதிக்கேற்ப ஆடு, மாடு, ஒட்டகம், செம்மறி ஆடு போன்ற கால்நடைகளை  அறுத்துப் பலியிட்டு (குர்பான்) குடும்பத்தினர், வசதி குறைந்தவர்கள், ஏழை எளியோர் போன்றோருடன் பகிர்ந்து கொள்கின்றனர். அத்தோடு ஒவ்வொரு வருடமும் துல்ஹஜ் மாதம் பிறை 8 தொடக்கம் 13  வரை இறுதி யாத்திரையான ஹஜ்ஜை உலகில் உள்ள அனைத்து முஸ்லிம்களும் இன, மத, நிற பேதமின்றி நிறைவேற்றுகின்றனர்.

அந்த வகையில் முழு உலகையுமே ஆட்கொண்டுள்ள கண்ணுக்குத் தெரியா கொரோனா வைரஸின் தாக்கத்தினால் பலர் உயிர்களை இழந்தும், இன்னும் பலர் தனிமைப்படுத்தல் முகாம்களிலும் மேலும் சிலர் சுய தனிமைப்படுத்தலில் ஈடுபட்டு வருகின்றனர். இதற்கு இலங்கை  மட்டும் விதிவிலக்கல்ல. இலங்கையிலும் கொரோனா வைரஸ் அதன் தாக்கத்தை வெளிக்காட்டுகிறது.

இதனால் கடந்த இரு வருடங்களாக மட்டுப்படுத்தப்பட்ட எண்ணிக்கையிலேயே முஸ்லிம்கள் தமது இறுதி கடமையை நிறைவேற்றுகின்றனர்.  சவுதி அரசும் அண்மையில் உள்ள ஒரு சில நாடுகளுக்கே புனித யாத்திரையான ஹஜ்ஜை நிறைவேற்ற அனுமதியளித்துள்ளது. இது முஸ்லிம் சமூகத்தைப் பொறுத்தவரை துர்பாக்கிய சந்தர்ப்பம்கும்.

அத்தோடு அரச சட்டங்களுக்கு உட்பட்டு முஸ்லிம் கலாசார அமைச்சு, வக்ப் சபை, அகில இலங்கை ஜம்மியத்துல் உலமா ஆகியோரின் வழிகாட்டுதல்களின் கீழ் பெருநாட்களை கொண்டாடுகின்றனர்.

பொதுவாக முஸ்லிம்கள் சுபுஹு தொழுகை (அதிகாலையில் எழுந்து நின்று தொழும் தொழுகை) முடிந்து சூரியன் உதயமாகி இருபது நிமிடங்களுக்குப் பிறகு இஸ்ராக் நேரத்தில் ஹஜ் பெருநாள் தொழுகையை நிறைவேற்ற வேண்டும். தொழுகையை நிறைவேற்றிய பின்னர் மூத்தவர்கள், இளையவர்களின் நல்வாழ்விற்கு நல்லாசி வழங்குவர். அதன்பின்னரே வீட்டிற்குச் சென்று காலை சிற்றுண்டி உண்ண வேண்டும். இவ்வாறே முஸ்லிம்கள் ஹஜ் பெருநாள் தினத்தை ஆரம்பிப்பார்கள். ஆயினும் இவ்வருடம் கொரோனா காரணமாக குடும்ப ஒன்றுகூடல் மற்றும் இதர ஒன்றுகூடல்களை தவிர்த்து அனைவரும் தத்தம் வீடுகளிலேயே ஹஜ் பெருநாளை கொண்டாடும்படி வலியுறுத்தப்பட்டுள்ளனர்.  இதுவே காலத்தின் கட்டாயமாக உள்ளது.

கடந்த வருடத்தைப் போன்று இவ்வருடமும் எவ்வித ஆரவாரமும் இன்றி அமைதியான முறையில் முரண்பாடுகள் அற்ற வகையில் அரசுக்கு கட்டுப்பட்டு நாட்டின் சூழ்நிலையைக் கருத்திற்கொண்டு சுகாதார அமைச்சின் வழிகாட்டுதலுக்கு ஏற்ப மக்கள் அனைவரும் அரசினால் முன்வைக்கப்பட்டுள்ள கொரோனா கால அறிவுறுத்தல்களை பின்பற்றி இவ்வருட ஹஜ் பெருநாளை கொண்டாடுவோமாக.

அனைவருக்கும் இனிய ஹஜ்ஜுப் பெருநாள் நல்வாழ்த்துக்கள்.

அனைவருமே பொய் சொல்கிறோம்.
அவற்றுள் சில பொருத்தமில்லாத பொய்களாகவும் சில சாதாரண ஏதுமே இல்லாத பொய்களாகவும் இருக்கின்றன. எது எவ்வாறாக இருப்பினும் அனைவருமே பொய் பேசுகிறோம் என்பது ஏற்றுக் கொள்ளக் கூடிய ஓர் விடயமே.

ஆனால் பின்வரும் காலங்களில் நீங்கள் சொல்லும் சில பொய்கள் உங்கள் பலமான உறவுகளின் அஸ்திவாரங்களை பலமிழக்க செய்கின்றன. அவ்வாறான பாதிப்பினை ஏற்படுத்தக் கூடிய பொய்களை தவிர்ப்பது சிறந்தது. ஏனெனில் இந்த பொய்கள் உறவுகளுக்கு இடையே கோபத்தினை வளர்ப்பதோடு அந்த கோபம், பலி வாங்கல் வரை சென்று உங்களையும் உங்கள் காதலையும் நிரந்தரமாக பிரித்து விடுகிறது.

கீழ்வரும் பொய்களை அனைவருமே ஏமாற்ற வேண்டுமென்ற எண்ணத்தோடு சொல்கிறார்கள் என்று அர்த்தமல்ல. இந்த பொய்களை சிலர் உண்மையாகவே அதே மனநிலையில் சொல்வதாகவும் இருக்கலாம். எது எவ்வாறாக இருப்பினும் இந்த பட்டியலினை நாம் அனைவரும் ஓர் முறை ஆராய்ந்து விட்டு வருவோம் வாருங்கள்.

1.”அவர் எனக்கு அண்ணா மாதிரி”

உங்கள் காதலி நீண்ட காலமாக குறிப்பிட்ட ஒரு பையனுக்கு தொடர்ந்து குறுஞ்செய்தி அனுப்புகிறாரா? ஆரம்பத்திலிருந்தே வெகுநாட்களாக அவர்கள் இவ்வாறு பேசிக் கொண்டிருக்கிறார்களா? அவ்வாறு உங்கள் காதலி தொலைபேசியில் பேசும் போது லேசாக புன்னகைத்தபடி பேசுகிறாளா? இதை எல்லாம் பார்க்கும் போது அவள் எப்போதும் அந்த பையனுடன் பேசுவதை நிறுத்த மாட்டாள் என்பதனை நீங்கள் உறுதி செய்துக் கொள்கிறீர்கள். ஒரு குறிப்பிட்ட காலத்திற்கு பின் நீங்கள் உங்கள் காதலியிடம் “அது யார்?” என வினவும் போது உங்கள் காதலி உடனே நீங்கள் சந்தேகப்பட்டு அஞ்சக் கூடும் என்பதற்காக “அவர் எனக்கு அண்ணன் போன்றவர்” அல்லது “நாங்கள் நல்ல நண்பர்கள்” என பதிலளிப்பார். அவருடைய பதில் உறுதியாக இருந்தால் பரவாயில்லை. அதற்கு மாறாக உங்களை சமாதானப்படுத்துவதுப் போல் தடுமாற்றத்துடன் காணப்பட்டால் உங்களை ஏமாற்றுவதற்கான பொய்யாக கூட அது இருக்கலாம். அவ்வாறு இருப்பின் இது நீங்கள் ஓர் உறுதியாக மற்றும் தெளிவாக மனம் திறந்து பேச வேண்டிய நேரம் என்பதை மறவாதீர்கள்.

2.”நான் ஒன்றும் கோபமாக இல்லை”

ஏய் ஆண்களே! அவள் கோபமாக இருப்பது ஒரு சாதாரண விடயம் தான். உங்களுக்கு கோபத்தினை ஏற்படுத்தாத சில விடயங்கள் அவளின் கோபத்திற்கு வித்திடுவதாக இருக்கலாம். நானும் ஒரு பெண் தான் ஆனாலும் “ஏன் இந்த பெண்கள் ஒன்றுமில்லாத விடயத்திற்கு எல்லாம் கோபப்படுகிறார்கள்!” என நினைத்தது உண்டு. எது எவ்வாறாக இருப்பினும் அவள் கோபமில்லை என கூறினால் கோபமாக இருக்கிறாள் என்று அர்த்தம். அதனால் அவள் கோபமாக இருக்கும் போது எதைப் பற்றியும் பேசாது அவள் கோபம் குறைந்த பின் பேசுவது நல்லது.

3.“ஆம், நான் 5 நிமிடங்களில் தயாராகி விடுவேன்”

இது உண்மையில் எங்கள் தவறல்ல. சில நேரங்களில் எங்களது தலைமுடி மிகவும் மோசமாக இருக்கிறது. சில நேரங்களில் எங்கள் ஒப்பனை தூரிகைகள் உடைந்து போகின்றன. ஏனெனில் நீங்கள் இலங்கையில் பெறும் ஒப்பனை தூரிகைகள் உண்மையில் அவ்வளவு நல்ல தரத்தில் இருப்பதில்லை. சில நேரங்களில் நாம் குண்டானதாக உணர்கிறோம். நேற்று நாங்கள் வாங்கி வந்த ஆடைகளில் இன்று அவ்வளவு அழகாக தோற்றமளிக்காதுள்ளோம். எனவே இப்போது அதனை அணிய முடியாது. ஒரு வழியாக எப்படியோ தயாராகி நாங்கள் கிட்டத்தட்ட கதவுக்கு அருகில் வரும் போது ​​அம்மா எங்களது ஆடைகளை பார்க்கிறார். நாங்கள் மீண்டும் அவற்றை அவரது விருப்பத்திற்கு ஏற்ப மாற்ற வேண்டும். எனவே நீங்கள் இந்த பொய்யினை பற்றி கற்பனை செய்துக் கொள்வதற்கெல்லாம் நாங்கள் பொறுப்பாக முடியாது.

4.”நான் உன்னை ஒருபோதும் காயப்படுத்த மாட்டேன் என்று நான் உறுதியளிக்கிறேன்.”

தற்காலிகமான இந்த உலகில் நிரந்தரமாக உடனிருக்க போவதாக வாக்களிக்கின்றோம். எவ்வளவு வேடிக்கையான வாக்குறுதி இது! உணர்வுப் பூர்வமான சூழ்நிலைகள் அமையும் போது எங்களுக்கே தெரியாமல் சில பொய்யான வாக்குறுதிகளை அளித்து விடுகின்றோம். அவள் எப்படியும் உங்களுடன் காதலில் இருக்கப் போகும் காலத்தில் குறைந்தது ஒரு தடவையாவது உங்களை காயப்படுத்த தான் போகிறாள். ஆனாலும் என்றுமே உன்னை காயப்படுத்த மாட்டேன் என வாக்களிக்கிறாள். உறவுகளில் எவ்வாறேனும் உங்கள் உணர்வு காயத்திற்கு உள்ளாகி நீங்கள் வருந்துவதற்கான சூழ்நிலை ஒரு முறையேனும் அமைந்து விடுகிறது. அதனால் காதலில் இருக்கும் போது சொல்லப்படும் அனைத்தையும் பெரிது படுத்தாமல் வாழ பழகுங்கள்.

5.“நீங்கள் சொல்லுங்கள்! நான் வருத்தப்பட மாட்டேன்! ”

இவ்வாறு அவள் கூறினால் நீங்கள் சற்று துரமாக ஓட வேண்டிய நேரம் இது. அவள் ஏற்கனவே வருத்தப்பட்டுக் கொண்டு தான் இருக்கிறாள். உங்களால் ஒரு அறிவு பூர்வமான அதே வேளையில் பொறுமையாக ஒரு குழந்தையுடன் உரையாடுவது போன்ற உரையாடலை முன்னெடுத்துச் செல்ல முடியுமென்றால் மட்டும் அவளுடன் பேசுங்கள். இல்லையெனில் எதுவும் பேசாமல் ஓடி விடுங்கள் ஏனெனில் உங்களது வார்த்தைகள் உங்களுக்கிடையே உள்ள அழகான பந்தத்தை சிதைத்து விடக் கூடும்.

6. “ஆம், நான் அவனை மறந்து விட்டேன்”

ஒரு பெண் எப்போதும் தான் விரும்பும் ஒரு குறிப்பிட்ட மனிதனைப் பற்றி நினைக்கும் போது அவள் மனதில் எவ்வாறான எண்ணம் ஓடும் என்பதை மேலே உள்ள படம் உங்களுக்கு காட்டுகிறது. அவள் அவனைக் கடந்துவிட்டதாக சொல்வதனால் ​​அவள் அவனை நேசிப்பதை நிறுத்திவிட்டாள் என்று அர்த்தமாகாது. அவள் அவனை நேசிக்கிறாள் தான் ஆனாலும் அவனிலும் அதிகமாக உங்களை நேசிக்கிறாள். அவள் அவனைப் பற்றி நினைக்கும் போது ஒரு முறை பெருமூச்சு விடுகிறாள். இதற்கு அர்த்தம் அவனைப் பற்றி அவள் நினைப்பதை கூறி உங்களை துன்புறுத்துவதை அவள் விரும்பவில்லை என்பது தான். எது எவ்வாறாகயிருப்பினும் அவள் இப்போது உங்களுடன் தானே இருக்கிறாள். அது அல்லவா முக்கியம். இந்த ஒரு விடயத்திற்காக நீங்கள் அவளை தள்ளி வைப்பது சரியான செயலல்ல. அவளது உணர்விற்கு மதிப்பளிக்க பழகுங்கள்.

இவை தான் பெண்கள் தன் காதலனிடம் அதிகமாக சொல்லும் பொய்கள்.

உங்களுக்கு இடையில் மலரும் புரிந்துணர்வில்லாமையினை இலகுவாக தீர்ப்பதற்கான ஒரே வழி உங்கள் துணைவர் அவருடைய உணர்வுகள் மற்றும் எண்ணங்களுடன் சேர்ந்து உங்களுடன் முன்னே நகர்ந்து கொண்டு வருகிறாரா என்பதனை உறுதி செய்துக் கொள்வது தான். ஒரு விடயத்தை மறவாதீர்கள், எந்தவொரு புரிந்துணர்வில்லாமையினையும் தகர்த்தெறிவதற்கு ஒரு சிறந்த கலந்துரையாடல் போதுமானது.

சட்ட ஒளி என்பது எமது நாட்டின் பொதுமக்களுக்கு சட்டம் பற்றிய அறிவூட்டும் நோக்குடன் இலங்கை சட்ட மாணவர்கள் சங்கத்தின் ப்ரோ போனோ குழுவால் ஒழுங்கமைக்கப்படும் ஓர் மும்மொழிக் கலந்துரையாடல்களின் தொடராகும். இந்தக் கட்டுரையானது ”குற்றம் மற்றும் சட்டம்” எனும் தலைப்பில் ஜனாதிபதி சட்டத்தரணி நலிந்த இன்ததிஸ்ஸ (குற்றவியல் வழக்கறிஞ்சர் மற்றும் கொழும்பு வர்த்தகக் கல்லூரியின் ஆலோசகர்), ஜனாதிபதி சட்டத்தரணி திரு. பிரசந்த லால் டி சில்வா (இலங்கையின் சீஷெல்ஸிற்கான தூதுவர் மற்றும் கொழும்பு பல்கலைக்கழக சட்ட பீடத்தில் வருகை தரும் விரிவுரையாளர்) மற்றும் திரு. கனகசபை ஷண்முகரட்ணம் (பகிரங்கப் பொதுச் சட்டம், குற்றவியல் சட்டம் மற்றும் மனித உரிமைகள் சட்டம் முதலான துறைகளில் வழக்கறிஞராக கடமையாற்றுபவர் மற்றும் கொழும்பு சட்ட சங்கத்தின் முன்னாள் தலைவர் – 2005) முதலான சட்டத்தரணிகளுடனான  கலந்துரையாடலினை அடிப்படையாகக் கொண்டதாகும்.

குற்றம் என்றால் என்ன?

ஒரு குற்றம் முழு சமூகத்திற்கும் எதிரான குற்றமாகும். ஒரு நபர் சமூக ஒழுங்கை சீர்குலைக்கும் போது அது ஒரு குற்றமாகின்றது. தவறு செய்ததற்காக ஒருவரை தண்டிக்கும் பொறுப்பை அல்லது அநீதி இழைக்கப்பட்ட நபருக்கு இழப்பீடு வழங்குவதற்கான பொறுப்பை அரசு ஏற்கின்றது.

குற்றத்தின் வகைகளை எம்மால் விரிவாகக் குறிப்பிட்டுக் கூற முடியுமா?

குற்றத்தில் தனிப்பட்ட குற்றங்கள், சொத்துக் குற்றங்கள், ஆரம்ப நிலைக் குற்றங்கள் (Inchoate crimes), சட்டக் குற்றங்கள் மற்றும் நிதி சார்ந்த குற்றங்கள் எனப் பிரிக்கலாம் என்பது அடிப்படையாக ஏற்றுக்கொள்ளப்பட்ட சிந்தனை வாதம்.

தனிப்பட்ட குற்றங்கள் எனப்படுபவை ஒரு நபரைத் தாக்குதல், கடத்தல் மற்றும் வீட்டிலுள்ளவர்களைப் பாதிக்கும் வீட்டு குற்றங்கள் முதலானவை ஆகும்.

சொத்துக் குற்றங்கள் பாரதூரமான தன்மையினைக்  கொண்டவையாகும். உதாரணமாக, பிறிதொருவருக்கு சொந்தமான சொத்திற்கான போலியானதோர் உறுதிப்பத்திரத்தினை எவரேனும் தயாரிக்கும் பட்சத்தில் – அவ் ஆவணமானது உண்மையான உரிமையாளரல்லாத பிறிதொரு நபரினையே உரிமையாளராக பிரதிநிதித்துவப்படுத்துகின்றது. திருட்டில் ஒரு சாரார் மட்டுமே பாதிக்கப்படுகின்ற போதிலும், சமூகம் இத்தகைய செயல்களைக் கீழ்த்தரமாக நோக்குகின்றது. ஏனெனில் திருட்டு நடக்க அனுமதிப்பதில் மனநோய் சார்ந்ததோர் நிலையே உள்ளது. கொள்ளையடித்தல் மற்றும் மிரட்டி பணத்தினைச் சூறையாடுதல் ஆகியன மிகவும் பாரதூரமான சொத்துக் குற்றங்களாகும்.

சட்டரீதியான குற்றங்கள் மரபுவழிக் குற்றங்கள் அல்லவெனினும் அவை வேதியியல் மற்றும் சமூக வளர்ச்சியுடன் நோக்குகையில் இனங்கண்டு கொள்ளக்கூடிய குற்றங்கள் ஆகும். நஞ்சுகள், அபின் அத்துடன் அபாயகரமான ஒளடதங்கள் சட்டத்தின் கீழ் குறித்த சில இரசாயனப் பொருட்களை வைத்திருத்தலானது அபிவிருத்திக்கு முன்னரான காலப்பகுதியில் சமுதாயத்தால் அறியப்படாததோர் விடயமாகக் காணப்பட்டது. இவ்வாறான போதைப்  பொருட்களை உடைமையில் வைத்திருப்பதே குற்றமாக கருதப்படுகின்றது. இக்குற்றங்கள் சமூகத்தின் ஒட்டுமொத்த கட்டமைப்பையும் பாதிக்கின்றன. மேலும் மதுபானத்தைக் குடித்து விட்டு வாகனத்தை ஓட்டல் மற்றும் சட்டரீதியற்ற மதுபான வகைகளை தயாரித்தல் மற்றும் உடமைப்படுத்தி வைத்திருத்தல் முதலான மதுபானத்துடன் தொடர்புடைய குற்றங்களையும் இவற்றோடு குறிப்பிடலாம்.

நிதி சார்த்த குற்றங்கள் அசையும் சொத்துக்களை உள்ளடக்கியவையாகும். சொத்தொன்றை உடைமையில் வைத்திருக்கும் நபரொருவர், அதனை சட்ட பூர்வமான உறுதிப்பத்திரத்தினை உடையவராய் இருக்கிறார் அல்லது அச்சொத்தை  நம்பிக்கையை மீறும் வகையில் பயன்படுத்தும் பட்சத்தில்  குற்றமுறையான நம்பிக்கை மோசடியை இழைக்கும் நபராய் இருக்கிறார். குற்றமுறையான கையாடல், மோசடி, பிரதிநிதித்துவப்படுத்தலானது நிகழும் சந்தர்ப்பத்தில் அல்லது ஒருவரைக் கொண்டு சொத்தொன்றினை கையளிக்கும் சந்தர்ப்பத்தில் இடம்பெறுகின்றது. அவை கடந்த காலங்களில் இடம்பெற்ற நிதி சார்ந்த குற்றங்களாகும். சமுதாயத்தின் அபிவிருத்தி மற்றும் சர்வதேச வர்த்தகம் என்பவற்றின் காரணமாக குற்றமானது நாடு கடந்ததாக மாற்றமடைந்துள்ளது. இதன் காரணமாக இன்று தீவிரவாத நடவடிக்கைகளுக்காக நிதியளித்தல், பணமோசடி, லஞ்சம் கொடுத்தல், ஊழல் அல்லது நாணயப் பரிமாற்றக் கட்டுப்பாட்டை மீறல் மற்றும் மோசடியான வழிமுறைகளூடாக பெறப்பட்ட பணத்தை வேறொரு நாட்டின் நிதிக்கட்டமைப்பில் முதலீடு செய்தல் போன்ற குற்றங்கள் இடம்பெறுகின்றன. மேலும், ஒரு வங்கி அல்லது நிறுவனத்தின் தரவுத் தளத்தினை உள்ளிட்டு, பணத்தை வேறு வங்கிக்கணக்கிற்கு மாற்றல் அல்லது சர்வதேச குற்றங்களில் ஈடுபடும் இரு தரப்பினரை இடைமறித்தல் போன்ற கணணிக் குற்றங்கள் இன்று இடம்பெறுகின்றன.

ஆரம்ப நிலைக் குற்றங்கள் (Inchoate crimes) – எந்தவொரு முக்கிய குற்றங்களுக்கும் உதவுதல் மற்றும் உடந்தையாய் இருத்தல் அல்லது எந்தவொரு முக்கிய குற்றங்களையும் இழைக்க சதி செய்தல். இது, குற்றமிழைக்க முயற்சி செய்தலையும் உள்ளடக்கியதாகும்.

நாம் வாழும் சமுதாயத்தில் அரசுக்கெதிரான எந்தவொரு செயலும் குற்றமாகவே கருதிப்படுகின்றது.

எவ்வாறு கைது செய்தல் இடம்பெறுகின்றது?

ஒரு குற்றம் இழைக்கப்பட்டதனை நாம் அறியும் போது நாம் பொலிஸாரிடத்துக்குச் செல்கின்றோம். அவர்களே பொதுவாக நாம் அறிந்த சமாதான அதிகாரிகள். சமாதான அதிகாரி எனும் சொற்பதமானது சட்டரீதியாக அங்கீகரிக்கப்பட்ட சட்டத்தை நடைமுறைப்படுத்தும்  அதிகாரியைக் குறிக்கின்றது. முதலாவதாக, நீங்கள் பொலிஸ் அதிகாரி ஒருவரிடம் முறைப்பாடொன்றைச் செய்யும் போது,  அவர் அது தொடர்பில் காணப்படக்கூடிய விடயக்கூறுகளை ஆராய்வார் என்பதுடன் அவற்றின் அடிப்படையில் குற்றமொன்று இடம்பெற்றமைக்கான நியாயமானதோர்  சந்தேகமொன்று நிலவுகின்றதா என மதிப்பிட்டுப் பார்ப்பார். அவ்வாறான  நியாயமானதோர் சந்தேகம் நிலவுகின்றமை கண்டறியப்பட்டதன் பின் அக்குற்றம் பிடியாணையின்றி ஒருவரைக் கைது செய்யக்கூடியவகையிலானதோர் குற்றமா என அவர் ஆராய்வார். மிகவும் பாரதூரமான குற்றங்கள் இழைக்கப்படும் போது ஒரு நபரை பிடியாணை இன்றி கைது செய்யலாம். சமுதாயத்திற்கு இழைக்கப்படக்கூடிய தீங்கு பாரதூரமானதாக இருக்கும் போது அக்குற்றம் தொடர்பில் நீதவான் நீதிமன்றத்தில் இருந்து பிடியாணையை பெற்றுக்கொள்வதற்கான  பொலிசாருக்குள்ள கால அவகாசம் போதாதுள்ளது. சட்டமானது, இப்பாரதூரமான குற்றங்களைக் குற்றவியல் நடபடிமுறைக் கோவையின் அட்டவணை 1 இல் குறிப்பிடுவதனூடாக அவற்றை இனங்காண்கின்றது. இது ஒரு ‘பிடியாணையின்றிப் படியியல் குற்றம்’ இல்லையெனில், அவர் தொடர்புடைய சாட்சியங்களை நீதவான் நீதிமன்றத்துக்கு அளிக்க வேண்டும்.

கைதினை மேற்கொள்ளவதற்கான 2 வழிமுறைகள் உள்ளன: அது ஒரு பிடியாணியின்றிப் படியியல் குற்றமாயின், பிடியானையின்றி கைது செய்ய முடியும் என்பதுடன் குறித்த நபரை நீதிமனத்தில் ஆஜர்ப்படுத்த முடியும். அது ஒரு பிடியாணியின்றிப் படியியல் குற்றமல்லவெனின் நீதவான் நீதிமன்றத்தால் ஏற்றுக்கொள்ளப்படக்கூடிய சாட்சியங்களை தெரிவித்தே  பிடியானையினை பெற்று கைது செய்ய வேண்டும்.

பொலிஸ் அதிகாரியைத் தவிர யார் கைது செய்ய முடியும்?

கிராம சேவை அதிகாரிகளுக்கு கைது செய்யும் அதிகாரம் கடந்த காலங்களில் அளிக்கப்பட்டிருந்தது. வனவிலங்குச் சட்டத்தின் கீழ்  வனவிலங்கு அதிகாரிகளால் பொலிசாருக்குரிய கடமைகளை ஆற்ற முடியும். சுங்கத் சட்டத்தின் கீழ் சுங்க அதிகாரிகளும் காட்டுக் கட்டளை சட்டத்தின் கீழ் காட்டின் அதிகாரிகளும் உணவுச் சட்டத்தின் கீழ் பொதுச் சுகாதார ஆய்வாளர்களும் இக்கடமைகளை ஆற்ற முடியும். இவர்களும் சமாதான உத்தியோகஸ்தர்களென அழைக்கப்படுகின்றனர்.

கைதை மேற்கொள்பவர்  அதற்கான காரணங்களைக் குறிப்பிட வேண்டுமா?

கைதானது யாப்பு மற்றும் குற்றவியல் நடபடிமுறைக் கோவை சட்டம் என்பவற்றின் பிரகாரம் மேற்கொள்ளப்பட வேண்டும். கைது செய்யப்படும் நபர் தாம் கைது செய்யப்படுவதற்குரிய காரணத்தை அறிதல் அவருடைய அடிப்படை உரிமையாகும். நபரொருவர் கைதினை தடுக்க முயலும் போது அதனை தடுத்து கைதினை மேற்கொள்ள மிகக் குறைந்தளவிலான எதிர்ப்பிரயோகத்தினையே மேற்கொள்ள முடியும்.

குறைந்தளவிலான எதிர்ப்பிரயோகம் என்றால் என்ன?

ஒரு நபரைக் கைது செய்ய போதியளவு பிரயோகம் பயன்படுத்தப்படலாம் எனினும் நியாயப்படி தேவைக்கதிகமான பிரயோகத்தினை மேற்கொள்ள முடியாது.

ஒரு நபர் விசாரணைக்குட்படுத்தப்படும் போது அவருடன் சட்டத்தரணி ஒருவரும் சமூகமளிக்க வேண்டுமா?

நீதித்துறைச்  சட்டத்தின் பிரிவு 41 இந்த படி ஒரு நபருக்கு அவரது கட்சிக்காரரை எந்தவொரு நீதிமன்றத்திலும் அல்லது நீதி நிர்வாகத்திற்காக நிறுவப்பட்ட எந்தவொரு நிறுவனத்திலும் பிரதிநிதித்துவப்படுத்துவதற்கான உரிமை உண்டு.

தடுப்புக் காவலில் உள்ள நபர் தொடர்பில் பொலிஸ் அதிகாரிக்குள்ள கடமை என்ன?

யாப்பின் பிரிவு 11 இற்கு இணங்க அவர்கள் சித்திரவதைக்கோ மற்றும் மனிதாபிமானமற்ற இழிவான நடத்தைக்கோ உட்டபடுத்தப்பட முடியாது. உடல்ரீதியான அல்லது உளரீதியான தீங்கு செய்யாமலிருப்பதற்கான கடமை அவர்களுக்குள்ளது.

பிரிவு 13 ஆனது குற்றமற்றவர் என்ற ஊகத்தினைப் பற்றி கூறுகின்றது எனினும் போது மக்கள், ஒரு நபரைக் குற்றமொன்றுடன் தொடர்புபடுத்தி செய்திகள் வெளியாகும் போது அவரை குற்றவாளியாகவே நோக்குகின்றனர். இதனை சட்டம் எவ்வாறு நோக்குகின்றதெனக் கூற முடியுமா?
பிரிவு 13(5), ஆளொவ்வொருவரும் அவர் குற்றவாளியென எண்பிக்கப்படும் வரை சுத்தவாளியென ஊகிக்கப்படுத்தல் வேண்டும் எனக் கூடுகின்றது. சுமத்தப்பட்ட குற்றச்சாட்டானது, குற்றவாளி அவர் மீது சுமத்தப்பட்டுள்ள குற்றத்தை இழைத்துள்ளார் என்பதனை நியாயமான சந்தேகத்திற்கு அப்பால் நிரூபிக்கும் வகையில் இருக்க வேண்டும். இன்று நடைபெறுவது யாதெனில், வழக்குவிசாரணையொன்று இடம்பெற முன்பே ஊடகங்களால் இத்தகைய விடயங்கள் பற்றி கூறப்படுவதால் எந்தவொரு குறுக்கு விசாரணையும் செய்யாது ஒரு மேலோட்டமான கோட்பாடு அது தொடர்பில் முன்வைக்கப்படுகின்றது. அவர்கள் சாட்சியின் நம்பகத்தன்மை தொடர்பில் சிந்திப்பதில்லை. நீதியை பெற ஆதாரங்களை முறையாக விசாரிக்க வேண்டும்.

நீதிமன்ற அவமதிப்பு ஒரு குற்றமா?

நீதி நிர்வாகத்தில் தலையிட முயற்சிக்கும் எவரும் நீதிமன்றத்தை அவமதிக்கும் குற்றத்தை இழைக்கின்றனர். இது ஒரு குற்றம் என்பதுடன் அவர்கள் சிறைக்கு அனுப்பப்படுவார்கள்.

பொலிஸார் முறைப்பாட்டை ஏற்கவில்லை என்றால் அது தொடர்பில் எடுக்கக்கூடிய நடவடிக்கை என்ன?

பொலிஸாரால் குற்றவியல் முறைப்பாடுகளை மட்டுமே விசாரணை செய்ய முடியும். சிவில் முறைப்பாடுகளை அவர்களால் விசாரணை செய்ய முடியாது. எனவே அவர்கள் ஒரு குற்றவியல் முறைப்பாட்டை ஏற்க மறுத்தால், நீங்கள் பொலிஸ் மா அதிபருக்கோ மனித உரிமைகள் ஆணைக்குழுவுக்கோ முறைப்பாடு செய்யலாம் அல்லது மேன்முறையீட்டு நீதிமன்றத்தினை அணுகலாம்.

ஸீனத் சாகிர்

ப்ரோ போனோ குழுவின் செயலாளர்  2020-2021

மொழிபெயர்ப்பு : சலோமி தாசன்  (ப்ரோ போனோ குழுவின் அங்ககவர்)

கலந்துரையாடல் முழுவதையும் ‘இலங்கை சட்ட மாணவர் சங்கம்’ எனும் எங்கள் யூ டியூப் சேனலில் மூன்று மொழிகளிலும் பார்வையிட முடியும்.

நாளாந்த வாழ்வியலில் தினமும் பல்வேறு வகைப்பட்ட மனிதர்களைச் சந்திப்பதும் அவர்களுடன் ஏதோ ஒரு வகையில் பிணைக்கப்பட்டதுமாகவே  நம்முடைய நாட்கள் நகர்கின்றன. இவ்வாறான தருணங்களில் இளைஞர்களுடனான அணுகுதல் நிச்சயமாக உம்மை ஆச்சரியப்பட வைத்திருக்கும். ஒரு குறிப்பிட்ட விடயம் தொடர்பான இளைஞர்களின் பார்வைகள்  கருத்துக்கள், முயற்சிகள்,  என அனைத்துமே முற்றிலும் வேறுபட்டதாக அமைவதில் ஐயமில்லை.  இதிலும் குறிப்பாக இன்றைய காலகட்டங்கள் என்று அணுகும்போது இளைஞர்கள் தொடர்பிலான பரவலாக எதிர்மறையான கருத்துக்களையே காணமுடிகிறது.  காரணம் அதிகரித்துவரும் சமூகப் பிறழ்வுகள் எல்லாம் ஆரோக்கியமான வளமான எதிர்காலத்தை செதுக்க வேண்டிய துடிதுடிப்பான கரங்களை நவீனம் ஆட்கொண்டு போதையில் சிக்குண்டு சமூகவலைத்தளங்களின் போர்வைக்குள் உறங்கும் படியாக ஆகிப் போவதென்பது மென்மேலும் அதிகரிப்பதே.

முற்றிலும் எதிர்மறையாக தான் இளைஞர்கள்  இயங்குகிறார்களா?  நிச்சயமாக இல்லை. சமூக சேவைகள், இரத்த தானங்கள், வறியோர்க்கு வலுவளித்தல்,  புதிய கண்டுபிடிப்புகள், விவசாயம் என பல்வேறுபட்ட ரீதியில் ஆக்கபூர்வமான சிந்தனைகளை ஏற்படுத்திக் கொண்டுதான் இருக்கின்றார்கள். எனினும் ஒட்டுமொத்த இளைஞர்கள் என்ற பார்வையில் இளைஞர்கள் மத்தியில் களைந்தெறியப்படவேண்டிய களைகளும் மேம்படுத்தப்பட வேண்டிய ஆளுமைத்திறன்களும் ஏராளம் இருக்கவே செய்கின்றன.

முதலில் இளைஞர்கள் என்றால் யார் என்று நோக்க வேண்டியது அவசியம். அதன்படி 15 வயது தொடக்கம் 25 வயதிற்குட்பட்ட அனைவருமே இளைஞர்கள் என ஐநா சபை வரையறுத்துள்ளது. னஅவை தவிர உலகளாவிய மக்கள் தொகையில் ஏழில் ஒரு பங்கினர் இளைஞர்களாகவே இருக்கின்றனர். அதேவேளை அதிலும் பெரும்பாலான இளைஞர்கள் அபிவிருத்தி அடைந்துவரும் நாடுகளிலேயே வாழ்கின்றனர். ஆக இத்தகைய நாட்டின் வளர்ச்சயையும்  வீழ்ச்சியையும் தீர்மானிக்கும் மாபெரும் சக்திகளாக இளைஞர்களே உள்ளனர்.

இவ்வாறாக இன்றைய இளைஞர் சமுதாயம் எவ்வாறான நிலைப்பாட்டில் உள்ளது என ஆராய்கையில் மிகவும் திறமை மற்றும் துணிச்சல் மிக்கவர்களாக இருக்கும் அதேநேரம் கருத்துக்களை தயக்கமின்றி வெளிப்படுத்த கூடியவர்களாகவும் இயலுமைளிற்கு மாறுபட்ட சூழலை ஏற்றுக்கொள்ள முன்வருபவர்களாகவும் மாற்றங்களை விரும்புபவர்களாகவும் இருப்பதோடு  கடின உழைப்பு மற்றும்  திறமைகளை வெளிக்காட்டுவதில் ஆண்கள் மட்டுமல்ல பெண்களும் தமது முழு பங்களிப்பை செலுத்துபவர்களாகவே  இருக்கின்றனர். அதேநேரம் விரும்பத்தகாத எதிர்மறை வழக்கப்பாடுகளையும் இலகுவில் ஏற்றுக் கொள்ளக் கூடியவர்களாகவும் உள்ளமை கவலைக்குரியது.

போதைவஸ்துக்கு அடிமையாதல், அதிகரித்து வரும் நவீன முன்னேற்றங்களில் செல்போன் மற்றும் நவீன சமூக ஊடகங்களின் மீதான மோகம், கலாச்சார பிறழ்வு, சுயநலச் சிந்தனைகள், ஆக்கபூர்வ செயற்பாடுகளில் ஆர்வம் குறைவு போன்ற இளைஞர்களது சுய ஆளுமை விருத்திக்கு பெரும் சவாலாகவே உள்ளது. இவ்வாறாக இளைஞர்கள் சமூகப் பிறழ்வுகள் எனும் வலைகளை தாண்டி ஏராளமான ஆக்கபூர்வ விளைவுகளை படைப்பதற்கு இளைஞர்கள் தத்தமது தனிநபர் ஆளுமை மற்றும் திறன்களை வளர்த்துக் கொள்ளுதல் பயன்மிக்கது.

சமூக சீர்கேடுகள் குறைந்து சமூகம் மற்றும் ஏனைய தனிப்பட்ட மேம்பாட்டுக்காக இளைஞர்கள் தமது அகம் மற்றும் புறம் சார்ந்த அளவில் முன்னேற்ற செயற்பாடுகளை மேற்கொள்ளுதல் அவசியம். அதன்படி தத்தமது வாழ்வியலுக்கான இலக்குகள் சார்ந்த செயற்பாடுகளில் இளைஞர்கள் கவனம் செலுத்த வேண்டும். வளர்ச்சியை முன்னெடுக்கும் சமூக விருத்திகள் தொடர்பான செயற்பாடுகளில் பங்கு எடுப்பதன் மூலம் சமூகம் சார்ந்த அறிவு விருத்தி என்பதுடன்ஒரு சமூக முன்னேற்றம் தொடர்பில் இளைஞர்களின் பங்களிப்பும் அதிகரிக்கும். சமூகத்திற்கும் தனி மனிதனுக்கும் நன்மை பயக்கும் கல்வியை இளைஞர்கள் பெறுவதற்கு முன் வருதல் நன்று. முறையான கற்றல் கற்பித்தல் செயல்முறைகளின் மூலம் சமூக அளவில் பாரபட்சமின்றி செயற்படவும் இலக்குகளை தீர்மானித்தல் மற்றும் பிரச்சனைகளுக்கு தீர்வு காணுதல் போன்றவற்றில் சரியான தீர்மானங்களை பின்பற்றவும் இயலும்.

இன்றைய இளைஞர்கள் சுய கட்டுப்பாடு விழுமியங்கள், கூட்டு செயன்முறைகள், புரிதல் போன்ற சுய திறன்களை வளர்த்துக் கொள்வதன் மூலம் கிடைக்கும் வாய்ப்புகளை புத்தாக்க முறையில் பயன்படுத்திக் கொள்ளுதல் நன்று.  கிடைக்கும் வாய்ப்புகளை பூரண படுத்தினால் மட்டும் போதுமானது என்று செயற்படும்போது இளைஞர்கள் தமது ஆற்றல்களை வெளிக்கொணர்வதற்கும் இனம் காண்பதற்கும் தவறுகின்றனர். தவிர முழு ஈடுபாட்டுடன் திறமைகளை வெளிக்காட்டும் போது குறித்த விடயம் தொடர்பில் ஈடுபாடு வளரும்.  இதன் விளைவாக விரும்பத்தகாத பழக்கவழக்கங்கள் தொடர்பான இளைஞர்கள் சிக்கலானது பெருமளவில் குறைய வாய்ப்புகள் அதிகம்.

இளைஞர்கள் இயலுமைகளை வெளிகாட்டுதலில் குடும்பம் மற்றும் சமூகத்தினரின் பங்கு இன்றியமையாதது. குறித்த இளைஞரது இளமைபருவத்தில் குழந்தைப் பருவத்தின் போது தன் பெற்றோர் மற்றும் சமூகத்தவர்களால் முன்வைக்கப்பட்ட  நேர்மறை எதிர்மறை கருத்துக்கள் பெரிதும் தாக்கம் செலுத்தும். நேர்மறையான எண்ணங்களைத் தவிர்த்து எதிர்மறையான கருத்துக்களைத் திணிக்கும் போது அவை தாழ்வு மனப்பான்மை மற்றும் பின்னிற்றல் போன்ற விளைவுகளை ஏற்படுத்தும்.”  உன்னால் முடியும்,  நிச்சயமாக வளமான எதிர்காலத்தினை உன்னால் அமைக்க இயலும், உன்னால் மற்றவர்களுக்கு உதவி செய்யவும் வழிகாட்டவும் இயலும்”  போன்ற நேர்மறை கருத்துக்களால் அவர்களின் எதிர்காலமே நிச்சயமாய் வளமாக அமையும் என்பதில் ஐயமில்லை.

இளைஞர்கள் ஒவ்வொருவரும் சமூகத்தின் தற்போதைய தேவை என உணர்தல் நன்று. செல்போன் சுவர்களையும் தாண்டிய சமூகத்தின் கட்டமைப்பை இளைஞர்கள் அவதானிக்க வேண்டும். கல்வியில் பின்தங்கும் மாணவர் தொகை உயர்வு, தொடர்ச்சியான வேலையற்றோர் தொகை பெருக்கம், வறுமை, குழந்தை தொழிலாளர்கள் போன்ற ஏராளமான சமூக பிரச்சினைகள் பரந்து காணப்படுகையில் இளையோரே இவை தொடர்பான விழிப்புணர்வுடன் செயற்படுமாறு தம்மை தாமே மேம்படுத்திக் கொள்ளுதல் வேண்டும்.  இவ்வாறான சமூக பிரச்சினைகளை நிவர்த்தி செய்ய திறமையும் துடிதுடிப்பும் ஆர்வமும் மிக்க இளைஞர்களே சமூகத்தின் தேவையாக உள்ளனர். இளைஞர்கள் தவறான பாதையை நோக்கி செல்கின்றனர் என்றும் இளைஞர்கள் ஆக்கபூர்வ விளைவுகளை வெளிப்படுத்த  தயங்குகின்றனர் என்று மட்டுமே தொடர்ச்சியாக இளைஞர்கள் மீது குற்றச்சாட்டுகளை திணிப்பதையும்  தாண்டி  சமூகத்தின் தேவைகள் மற்றும் எதிர்பார்ப்புகளை இளைஞர்களுக்கு தெளிவுபடுத்துதல் சமூகத்தின் கடமையாகும்..

இன்றைய பெருமளவிலான இளைஞர்கள் பலவீனமாக இருப்பதற்கு காரணம் சமூக அரங்கு மற்றும் கட்டமைப்புகள் தொடர்பான குழப்பமான நிலையே ஆகும். பொறுப்புகள் தொடர்பான புரிதல்கள் இல்லாமல் தேவையற்ற விடயங்களில் தம்முடைய துணிச்சலையும் ஆர்வத்தையும் வெளிகாட்டும் இளையோர்கள்  கல்வி, தொழில், சுய முயற்சி தொடர்பாக தம்மீது தாமே கொண்டுள்ள தாழ் மதிப்பீட்டால்  புத்தாக்க  முயற்சிகள் தொடர்பாக பெரிதும் தயக்கம் காட்டுகின்றனர். இது சார்பாக  பல்வேறான நூல்கள் வெற்றியாளர்களின் வாழ்க்கை பக்கங்கள் தொடர்பான அறிவுகளை  வளர்த்துக்கொள்ளுதல் இளைஞர்களுக்கு அவசியம்.

இளைஞர்களுடைய  மனோநிலை என்று அணுகுகின்ற போது வெளிவாரியான செயற்பாடுகளில் எவ்வளவு துணிச்சலை காட்டிய போதும் தனிப்பட்ட மனநிலையில் உறுதிப்பாடு குறைந்தவர்களாகவே உள்ளனர். நேர்மறையான எண்ணங்களை பொருத்திக் கொள்ள இயலாமல் சிற்சிறு சவால்களில் கூட தற்கொலைகள், போதைக்கு அடிமையாதல், பிறழ்வான விரும்பத்தகாத செயல்களில் ஈடுபடல் போன்ற செயல்களை நாடிச் செல்கின்றனர். இவற்றை இளைஞர்கள் உணர்தல் அவசியம்.  நான் யார், என்னால் எது இயலும்,  ஒரு ஆக்கபூர்வமான மாற்றத்தை என்னுள் நானும் என் சமூகத்திலும் என்னாலும் ஏற்படுத்த இயலுமா போன்ற வினாக்களை எழுப்புவதுடன் சுய விமர்சன அணுகுமுறைகளைக் கைக்கொள்ளுதலும் பயன்மிக்கது. கல்வியில் தேர்ச்சி அடைந்தவர்கள் கூட  இவ்வாறான எதிர்மறை கருத்துக்களை கொண்டிருத்தலிற்கும் வாழ்தல் தொடர்பான விரக்திக்கு தள்ளப்படுதலிற்கும் சுயம் தொடர்பான போதிய தெளிவு இன்மையே காரணம் ஆகும்.

இளைஞர்கள் தம்மைத்தாமே பிறருடன் ஒப்பிடுதலும் பெற்றோர்கள் இன்னொருவருடன் ஒப்பிட்டுப் பேசுதலும் பாரிய எதிர்மறையான விளைவுகளை திணிக்கும் அம்சமாக மாறிவிடும். ஒவ்வொரு இளைஞர்களும் தனித்துவம் மிக்கவர்கள். ஒவ்வொருவருக்குள்ளேயும் அற்புதமான ஆளுமைகள் இருக்கின்றன. அவற்றை ஆக்கபூர்வமான முறையில் வளர்ப்பதற்கான சாவிகள் சமூகத்தின் திண்ணையிலேயே இருக்கின்றன அதனை அனைவரும் புரிதல் நன்று.

ஒவ்வொரு இளைஞர்களும் சுதந்திர விரும்பிகளே. அவர்களை நெருடலுக்குள்ளாக்காமலும் பிறப்பான் பாதையில் செல்லாத படிக்கும் வழிநடத்துதல் அவசியம். ஆக ஒவ்வொரு இளைஞர்களுக்கும் பெற்றோர்களின் அருகாமை மிகவும் அவசியமான ஒன்று.  இணையதளத்திலும் சமூக வலைத்தளங்களிலும் தத்தமது ஆளுமைகளை வெளிப்படுத்தும் இளைஞர்களின் திறமைகளை அவர்களே அறியுமாறு அடையாளப்படுத்துதல் பயன்மிக்கது. இளமை பருவத்தின் இன்னல்களை தாண்டிய அருமையை அவர்கள் உணர வேண்டும்.  தொலைபேசியுடன் அவர்கள் செலவழிக்கும் நேரத்தை குறைத்து தொழில் முயற்சிகளில் ஈடுபடுதலிற்கான ஊக்குவிப்புக்கள் நன்று. உலகின் அனைத்து நாடுகளிலும் உயர்கல்வி, தொழிற்கல்வி, பகுதிநேர பயிற்சிகள் போன்றன வழங்க அரசு மற்றும் அரசு சார்பற்ற நிறுவனங்கள் பரவலாக வாய்ப்புகளை வழங்குகின்றன. அவற்றை பயன்படுத்தி பயனுள்ளதாக்குவதற்கான தெளிவு இளைஞர்களிடம் அவசியம்.

உலகமே நவீனமயமாக்கப்பட்ட புதியதொரு யுகத்திற்கு உள்நுழைந்து கொண்டிருக்கும்போது இளைஞர்களை மட்டும் தடுத்தல் நன்றல்ல. ஆனால் அவை ஆக்கபூர்வமான நேர்மறையான நவீனத்துவ ஏற்றுக்கொள்ளுதல் என்றாகுமேயானால்  அது பயன்மிக்க மாற்றங்களை ஏற்படுத்தும். இவை  அறிவு, திறன், சமுதாயம், பொருளாதாரம், விஞ்ஞானம் என அனைத்து வழிகளிலும் எதிர்காலம் என்பது மாறும் கனவு தவிர்ந்த நனவாக மாறும்.

தத்தமது வாழ்க்கையை தானே பொறுப்பேற்று கொண்டு செல்வதற்கான வெளிகளை பெற்றோர்கள் இளைஞர்களுக்கு வழங்குவதோடு அவர்களது பயணம் நேர்மறையாக அமையுமாறு ஊக்குவிப்புகளை வழங்குதல் நன்று. இதன்மூலம் அவர்களின் நம்பிக்கைகளுடன், இலக்குகள் குறித்த முயற்சிகளுக்கான அதிகாரமளித்தல் எனும் தொனியானது  இளைஞர்களின் வாழ்க்கை தரத்திற்கான மேம்பாடு என்பதேயாகும். எவ்வாறாயினும் இளைஞர்களிற்கு அதிகாரமளித்தல் தொடர்பான நிகழ்ச்சித் திட்டங்கள் உலகளாவிய ரீதியில் நடைபெற்று வருகின்றமை குறிப்பிடத்தக்கது.

இளைஞர்களுக்கு அதிகாரமளித்தல் செயற்பாடுகளில் சிறந்த தலைமைத்துவ பயிற்சிகள்,  வாழ்க்கை திறன் விருத்தி செயற்பாடுகள்,  சுயமரியாதை பயிற்சிகளை, முறையான கருத்து தொடர்பாடல் பயிற்சிகள், தனிநபர் சமூக நடத்தை கோலங்கள்,  தொடர்பான செயற்பாடுகளை மேம்படுத்தும் போது வளமான பொறுப்புகளை ஏற்கவும் செயல்படுத்தவும் இயலுமான இளைஞர் படையை உருவாக்க முடியும்.

இளைஞர்கள் செயற்பாடுகள் மூலம் பெண்களின் நல்வாழ்வு மற்றும் சிறுவர்கள் தொடர்பான சமூகப் பிரச்சினைகளை நிவர்த்தி செய்யவும் முடியும். அதன்படி குறிக்கோள்கள் மற்றும் செயற்பாட்டு முறைகள் பற்றிய குறுகிய வட்டத்திற்குள் இளைஞர்களது வெளிப்பாடுகள் மட்டுப்படுத்தப்படாது பரந்துபட்ட வகையில் அமைதல் நன்று. அத்துடன் இளைஞர்கள் பிற இளைஞர்களுக்கு அதிகாரமளித்தல், கல்வி, பொருளாதாரம்,  வாழ்க்கைத் திறன் போன்றவற்றில் பரஸ்பர உதவிகள் போன்றவற்றை பகிர்தல் நன்று.  ஏழை இளைஞர்களை மேம்படுத்தவும் வாய்ப்புகளை அளிக்கவும் வாழ்வாதார திட்டங்களை அமல்படுத்தவும் இளைஞர்கள் முன்வருதல் மூலம் பின்தங்கிய மக்களின் சமூக சக்தியை மேம்படுத்த இயலும்.  திட்டங்களை ஒழுங்கமைக்க இளைஞர்களது குழுமம் அதிகாரம் மிக்கதாகவும் ஆளுமைச்செறிவு கொண்டதாகவும் அமைதல் நன்று.

இவை தவிர இளைஞர் செயற்பாடுகள் தொடர்பான ஆவணப்படுத்தல்கள் மிகவும் பயன் மிக்கது.  எதிர்கால இளைஞர் படையை ஆக்கபூர்வமான வளப்படுத்த இன்றைய ஆவணப்படுத்தல்கள் அவசியம். இலங்கையை எடுத்து கொண்டால் இளைஞர்களுக்கு அதிகாரமளித்தல் தொடர்பாக செயற்படும் அமைப்புக்கள் , சமூக மற்றும் பின்தங்கிய இளைஞர்களை மேம்படுத்தும் திட்டங்கள்,  கல்வி மற்றும் தொழில் முறைகளை மேம்படுத்தும் நடைமுறைகள், அடிப்படைக் கல்வியை வழங்குவதோடு வாழ்க்கைக்கான வலுவான அடித்தளத்தை உருவாக்குவதற்கான நிகழ்ச்சி முறைகள் என்பன பரவலாக அரச மற்றும் அரச சார்பற்ற நிறுவனங்கள் மூலம் இலாப, இலாப நோக்கற்ற முறையில் நடைமுறையில் இருத்தல் வரவேற்கத்தக்கது.

சமூக செயற்பாடுகள் ஆளுமை விருத்தி நிகழ்ச்சித் திட்டங்கள் போன்றவற்றில் இளைஞர்கள் பங்குபெறும் போது பலவிதமான நேர்மறை விளைவுகள் ஏற்பட வாய்ப்புகள் அதிகம். சமூகத்தின் பிரச்சினைகள் சிக்கல்களில் இளைஞர்கள் தீர்வுகளை தரக்கூடியவர்களாக ஆளுமை பெறுகின்றனர். இவற்றின் அடிப்படையில் இளைஞர்கள் தாமாக முன்வந்து சமூக கல்வி பொருளாதார அரசியல் மற்றும் பௌதிக அம்சங்களில் தமது செல்வாக்கினை வெளிப்படுத்தலும் பங்குபற்றுதலை கணிசமான அளவில் அதிகரித்தலும் அவசியம்.

இளைஞர்கள் சமூகப் பொறுப்புகளை ஏற்றலும் கடமைகளை பகிர்ந்துகொள்ளுதலும் முடிவெடுப்பதில் பங்குபற்றும் ஆற்றலை அதிகப்படுத்துதலும் ஆரோக்கியமான தலைமுறைக்கு வழிகோலும். இளைஞர்கள் தொடர்பான சமூகப் பிறழ்வுகளை மட்டும் பேசிக் கொண்டிருப்பதற்கு மாற்றீடாக வளமான சமூக உருவாக்கத்திற்கு இளைஞர்களிற்கு  ஊக்குவித்தலும் உந்துதல் அளித்தலும் தற்காலத்திற்கு தேவையான அம்சமாகும். இளைஞர்கள் சரியான வழியில் முறையாக வழிநடத்தப்படும் போது சமூகப் பிறழ்வுகள் கணிசமான அளவு குறைவடைவதற்கு பெரிதும் வாய்ப்புகள் அதிகமே.

அறிவாற்றல், ஆக்கபூர்வ அதிகாரம் அளிக்கும் தன்மை, தொழில்நுட்ப அறிவு,  நாட்டம் போன்றவற்றை சரியான முறையில் செலுத்தும்போது இளைஞர்களுடைய வளர்ச்சி மட்டுமல்லாமல் சமூகத்தின் வளர்ச்சி மட்டுமில்லாமல் மொத்த தேசிய அபிவிருத்தியும் வளர்ச்சியை நோக்கி செல்லும் என்பதில் ஐயமில்லை.  இளைஞர்கள் சமூக அளவிலும் தனிநபர் அளவிலும் சமூக தனிப்பட்ட முன்னேற்றங்களை முன்னெடுத்தல் நன்று.  மாபெரும் ஆற்றல் மிக்க இளைஞர் படையை உருவாக்குவதற்காக ஒன்றிணைவோம். மாற்றங்களை நோக்கி பயணிப்போம்.